धनगढी०४ जेठ  । अरब सागरबाट उठेको ताऊ ते नाम दिइएको चक्रवात वायुका कारण भारतका विभिन्न क्षेत्र निकै प्रभावित भइरहेका छन् ।

कर्नाटक, केरल, महाराष्ट्र  र गोवामा हुँदै अहिले यो वायुले गुजरात पुगेको भारतीय मिडियाले जनाएका छन् । यस वायुले गुजरातलाई निकै प्रभावित बनाइरहेको छ ।

भारतीय मिडियाका अनुसार तीब्र वायुका साथै यसले गुजरातका विभिन्न जिल्लामा भारी वर्षा पनि गराइरहेको छ । समुँद्री तटमा उठेको छालले  तटीय क्षेत्रका सहर प्रभावित भएका छन्  ।

यस आँधीका कारण  मंगलबार बिहानसम्म भारतका ५ राज्यमा गरी १७ जनाको मृत्यु भएको छ ।

भास्करले दिएको खरब अनुसार यस आँधीका कारण कर्नाटकमा ५ जनाको मृत्यु भएको छ । महाराष्ट्रमा ८, गोवामा २ र तामिलनाडुमा २ जनाको मृत्यु भएको छ ।

रुख ढलेर, घर तथा पर्खाल ढलेर त्यसमा च्यापिएर मृत्यु भएको हो ।

अरब सागरबाट उठेको यो आँधीले गुजरात आइपुग्दा १२०० किलोमिटर भन्दा धेरै दूरी पार गरिसकेको भारतको मौसम विभागले जनाएको छ । मौसम विभागले बताए अनुसार पछिल्ला २ दशकमा अरब सागरबाट उडेको आँधी मध्ये यो आँधी सबैभन्दा धेरै दूरी पार गर्ने आँधी हो ।एजेन्सी