कैलाली । आगामी फागुन २१ गते हुने प्रतिनिधिसभा निर्वाचनलाई लक्षित गर्दै कैलाली क्षेत्र नम्बर ५ मा नेपाली कांग्रेसभित्र आन्तरिक राजनीतिक गतिविधि बढेको छ । कांग्रेस निकट स्रोतहरूले दिएको जानकारीअनुसार पार्टीकी केन्द्रीय सदस्य तथा पूर्व परराष्ट्रमन्त्री डा. आराजु राणा देउवा सो क्षेत्रबाट   चुनाव लड्ने  तयारीमा  रहेकी छिन् ।जेनजी आन्दोलनपछि स्थानीय कार्यकर्ता, जनप्रतिनिधि तथा पार्टी नेतृत्वसँग निरन्तर आन्तरिक छलफलमा सक्रिय देखिएपछि उनको उम्मेदवारीबारेको चर्चा झनै बलियो बन्दै गएको छ । पार्टी स्रोतका अनुसार हालै कैलाली ५ का काँग्रेस नेताहरूबीच भएको परामर्शमा डा. राणाको नाम अग्रपंक्तिमा रहेको र राजनीतिक गतिशीलतामा सक्रिय भईसकेको संकेत मिलेको छ ।डा.आराजु राणाले पूर्व परराष्ट्रमन्त्रीका रूपमा कूटनीतिक क्षेत्रमा उल्लेख्य भूमिका निर्वाह गरेको पार्टी निकट नेताहरू बताउँछन् । स्रोतका अनुसार अन्तर्राष्ट्रिय तहमा नेपालको छवि मजबुत बनाउने, कूटनीतिक समन्वय तथा विदेश नीतिमा सक्रियता बढाउने कार्यमा उनले महत्वपूर्ण योगदान दिएका थिए । यही कारण क्षेत्रभित्र पनि उनको नेतृत्व क्षमताबारे सकारात्मक बहस हुँदै आएको देखिन्छ । यसअघि भएको निर्वाचनमा उनी नारदमुनि रानासँग पराजित भएकी थिइन् । तर, यसपटक स्थानीय नेतृत्व र कार्यकर्ता स्तरमा उनको प्रस्तुतिलाई नयाँ ऊर्जा र अवसरको रूपमा लिइएको कांग्रेस निकट स्रोतहरू बताउँछन् ।कैलाली क्षेत्र नम्बर ५ का काँग्रेस नेताहरूले छिट्टै आधिकारिक रूपमा नाम सिफारिस गर्ने तयारी थालेको पनि स्रोतले जनाएको छ । चुनाव मिति नजिकिँदै जाँदा क्षेत्र नम्बर ५ को राजनीतिक वातावरण चर्किँदै गएको छ भने डा. आराजु राणाको सम्भावित उम्मेदवारीले कांग्रेसभित्र नयाँ उत्साह सिर्जना गरेको देखिन्छ ।डा. राणाले कैलाली ५मा विकास निर्माण समेत उल्लेख्य भूमिका निर्वाह गरेकोले पनि  निर्वाचनमा सहज हुने डा. राणा निकट काग्रेस नेताहरुले बताएका छन् ।