धनगढी— धनगढीका एक दम्पतिको घर आफूले काम गर्ने साहुले बिक्री गरेको थाहा पाएका छन् । धनगढी उप-महानगरपालिका वडा नम्बर १ बसन्त टोलका एक दम्पतीले आफ्नै घर बिक्री भएको एक साता सम्म थाहा पाएनन् । गत माघ २४ गते बिक्री भएको घर खरिद गर्ने ममता सैजुले घर खाली गर्न भनेपछि उनीहरुले आफ्नै घर बिक्री भएको थाहा पाएका हुन् ।

५ धुर जमिनमा निर्मित उनीहरुको घर गत माघ २४ गते धनगढीकै ममता सैजुको नाममा नामसारी भएको पाइएको छ । आफ्नै घर बिक्री भएको थाहा पाएपछि दम्पति निकै दुखी बनेका छन् । सम्पतिको नाममा भएको घर नै अर्कैले बिक्री गरिदिएपछि उनीहरुले न्यायका लागी गुहारिरहेका छन् ।

घटना 

उमेरले ४० काट्नै लागेका करन चहडा । एक महिनादेखि न्याय माग्न भौँतारिरहेका छन् । करन दिनहुँ जसो कहिले प्रहरी, कहिले वकिल त कहिले पत्रकारहरुलाई भेट्छन् । निन्याउरो अर्थात खुशी हराएको अनुहार र हातमा केही फोटोकपी पेपरहरू बोकेर न्यायकै लागि भौँतारिरहेका हुन्छन् । कैलालीको धनगढी उपमहानगरपालिका–१ बसन्त टोलका करन झण्डै १२ बर्षअघि भारतबाट नेपाल फर्किए । लामो समय भारतमा दुख गरेर नेपाल फर्किएका करन नेपाल फर्किने र घरपरिवारसँगै सुख(दुख गरेर यतै बस्ने योजनामा थिए ।

नेपाल आएपछि यतै केही व्यवसाय गर्ने योजना बनाएका करनले होटल सञ्चालनको तयारी थाले । भारतको विभिन्न होटलमा काम गरेर अनुभव बटुलेका करनलाई नेपालमा होटल व्यवसाय गरेर सजिलै आम्दानी गर्छु भन्ने आँट थियो । भारतमा मजदुरी गरेर कमाएको पैसाले ५ धुर जमिन र घर जोडेका करनले होटल सञ्चालनको लागि ऋण लिनुपर्ने अवस्था आयो । ऋण खोज्दै जादाँ धनगढी उपमहानगरपालिका–५ जाईका हेमराज जोशीसँग करनको भेट भयो । भर्खर विदेशबाट फर्किएका हेमराज करनलाई ऋण दिन तयार भए । २०७२ साल बैशाखमा करनले हेमराजबाट झण्डै ४ लाख रुपयाँ ऋण लिए । बार्षिक २० प्रतिशत ब्याजदरमा ऋण लिएका करनलाई धरौटीमा जग्गा आफ्नो नाममा नामसारी गरिदिनु पर्ने प्रस्ताव हेमराजले राखे । पैसाको अत्यासका कारण करन सोही सर्तमा मन्जुर भए र आफ्नो नामको घर जग्गा हेमराजको नाममा गरेर झण्डै ४ लाख रुपयाँ ऋण लिए ।

उक्त ऋण लिएको रकमबाट धनगढीकै क्याम्पस रोडमा होटल व्यवसाय सञ्चालन गरेका करनले झण्डै तीन बर्ष होटल चलाए । होटल नचल्ने र व्यवसाय अगाडी बढाउनै हम्मेहम्मे भएपछि करन झनबढी ऋणमा डुबे । व्यापार नचल्ने भएपछि करनले होटल बन्द गर्नु पर्यो । त्यसपछि उनि धनगढीकै विभिन्न होटलहरुमा काम खोज्न तर्फ लागे । त्यतिबेलासम्म परिवारमा कुनै समस्या थिएन् । सामान्य तरिकाले घर व्यवहार चलिरहेको थियो । होटल सञ्चालनका लागि ऋण पनि मजदुरी गरेर तिर्छु भन्ने आँट थियो ।

हेमराजसँग लिएको ऋण र दुईतीन बर्षदेखीको ब्याजले थिचेका करन कामको खोजीमा भौँतारिरहेका थिए । काम खोक्दै जादाँ करनले धनगढीको हसनपुरमा रहेको विकास होटलका सञ्चालक यज्ञप्रसाद तिवारीलाई भेटे । तिवारीले आफ्नै होटलमा करनलाई म्यानेजरको काम समेत दिलाए । धनगढीमा राम्रै चलेको होटलमा म्यानेजरको काम पाएर खुशी भएका करनले सायद कल्पना समेत गरेका थिएनन् होला यसरी घरबार बिहीन हुन्छु भनेर । आफ्नो मालिक यज्ञप्रसाद तिवारीलाई औधी विश्वास गरेका करनले आफ्नो ऋणमा डुबेको पिडा सुनाए ।

ऋणमा डुबेको र जग्गा साहुको नाममा रहेको पिडा सुनाएपछि यज्ञ प्रसादले करनलाई ऋण मुक्त गराइदिने र घर जग्गा फिर्ता गर्ने आश्वासन दिलाए । ऋण लिदाँ घर जग्गा साहुको नाममा गरिदिएको कमजोरी थाहा पाएका यज्ञ प्रसादले उक्त जमिन आफ्नो बनाउने नयाँ षडयन्त्र रच्न थाले ।

लगत्तै यज्ञ प्रसादले हेमराजको सावाँ र ब्याज सहित साँढे पाँच लाख चुक्ता गरिदिए र उनको नाममा रहेको जमिन ऋण नतिरुन्जेलसम्म आफ्नो नाममा नामसारी गर्नुपर्ने सर्त राखे । करन यज्ञ प्रसादको उक्त सर्तमा समेत मन्जुर भए र हेमराजको नाममा रहेको जमिन धरौटी स्वरुप यज्ञ प्रसादको नाममा गरिदिए । हेमराजको ऋण चुक्ता र उनको नाममा रहेको जमिन आफ्नै मालिकको नाममा आएपछि एउटा तनावबाट मुक्त भएका करन होटलबाट कमाएको ज्याला समेत नबुझेर ऋण घटाउन भन्थे ।

झण्डै एक बर्ष यज्ञ प्रसादको विकास होटलमा काम गरेका करनलाई विस्तारै यातना दिन सुरु गरे भने करनको घरमा आएर श्रीमती र छोरीहरुलाई दुर्व्यबहार गर्न थाले । यज्ञ प्रसादले ऋणबाट उकासेको र श्रीमानलाई जागिर दिएको गुन सम्झेर करनकी श्रीमती  लाली देवी चहडा यातना दुर्व्यबहार सहन बाध्य भइन् । यज्ञप्रसाद कहिलेकाही त घरमै आएर दुव्र्यवहार गर्थे भने कहिले विभिन्न बाहाना बनाएर होटलमा बोलाएर दुर्व्यबहार गर्थे । यज्ञप्रसाद घरमा आएर छोरीहरुलाई समेत हातपात गर्न भ्याउँथे । आँखाभरि आशु खसाल्दै लालिदेवीले सुनाईन्–‘आफ्नो रगत पसिना बगाएर बनाएको घर र श्रीमानले भारतमा भाडा माझेर किनेको जमिन जोगाउने आशमा यो पिडा कसैलाई सुनाउन सकेन्, उता श्रीमानलाई होटलमा बन्धक जस्तै बनाएको थियो, यता राति राति घरमा आर दुर्व्यबहार गर्थ्यो ।’

यस्तै यातना र परिवार माथि गरेको दुव्र्यवहार सहन नसकेर करनले ऋण चुक्ता गर्ने र काम छोड्ने निधो गरे । यज्ञ प्रसादले हेमराजलाई दिएको झण्डै ७ लाख रुपयाँ ऋण चुक्ता गर्न करनलाई एउटै मात्र विकल्प थियो आफ्नो भाइको नाममा रहेको जमिन बिक्रि गर्ने । एक बर्ष अगाडी धनगढी उपमहानगरपालिका १२ जुगेडामा भाइको नाममा रहेको जमिन बिक्रि गरेर यज्ञ प्रसादको ब्याज सहित ऋण फिर्ता गरेका करनले आफ्नो घर जग्गा फिर्ता आउने आशमा थिए । ऋण चुक्ता गरेपछि जग्गाको लालपुर्जा फिर्ता गर्न आग्रह गरेका करनलाई यज्ञ प्रसादले बिभिन्न बाहाना बनाए टार्थे भने जग्गा फिर्ता गर्न आनाकानी गरिरहेका थिए । यहि बिचमा यज्ञ प्रसादले करनको घर जग्गा गत फागुन २३ गते धनगढी उपमहानगरपालिका ४ का ममता प्रसाद सैजुलाई  बिक्रि गरिदिए ।

केही उपाय नलागे स-परिवार आत्मदाह गर्छु 

बैंक स्टेटमेन्ट हेर्दा चेहडाले ग्लोबल बैंक मार्फत तिवारीबाट लिइएको रकम तिवारीको खातामा जम्मा  गरेको पाइन्छ । साहुबाट लिएको ऋण चुक्ता गरेका चेहडाले घर नामसारी गर्न धेरै पटक आग्रह गरेपनि नामसारी नभएको बताए । साहुको ऋण मैले सबै चुक्ता गरिसकेको थिए चेहडाले  भने ‘तर मेरो जमिन फिर्ता भएन, बरु होटेल साहु तिवारी उल्टै मेरो घरमा आएर श्रीमतीलाई घरमा अब होटेलको स्टाफ बसाल्छु, केही कोठा खाली गर भनेर भन्न थाले, मैले कुरा गर्दा घर फिर्ता भइहाल्छ केही दिनमा नामसारी गर्छु भनेर बचन दिने तर नामसारी गरिदिनुभएन ।’

मेरो आमाबुवा भारतमै बस्नुहुन्थ्यो म उतै जन्मेर उतै हुर्केको हुँ चेहडाले भने ‘मेरो बुवाआमाको निधन भएपछि म नेपाल आएको हुँ, ऋण लागेर एकमुस्ट तिरौँ भनेर ठुलो रकम ऋण माग्न खोज्दा कसैले दिन मानेनन् र मैले जग्गा नामसारी गरेर ऋण लिएको हुँ, आफैले काम गरेको होटेल साहुले मेरो घरजग्गा अर्कैलाई बेच्नुहुन्छ होला लागेन र मैले समय कुरिरहे तर एक्कासी माघ २४ गते जग्गा अरुलाई बेचेको थाहा पाएपछि छानाबाट खसेझैँ भएको छु, अब म कहाँ जाने, न्याय खोज्न के गर्ने मलाई धेरै ज्ञानपनि छैन कानुनको बारेमा त्यही भएर तपाइहरुकहाँ पुगेको छु ।’  म ठगिएको छु, घर बनाउँदा परेको ऋण तिर्नका लागी ऋण माग्दा कसैले दिनुभएन र जग्गा नामसारी गरेरै ऋण मागेको थिए उनले भने ‘अब जग्गा माग्दा दिन मान्नुहुन्न म कहाँ जाने उल्टै मलाई घर छोड भनेर धम्की आउँछ ।’

सापटी लिएको रकम फिर्ता गर्दा समेत जग्गा नामसारी नगरी उल्टै अरुलाई नै बिक्रि गरेका यज्ञ तिवारीमाथि चेहडाकी श्रीमतीले यौन दुर्व्यवहारको समेत आरोप लगाएकी छिन् । समय –समयमा विभिन्न बहाना गरेर यज्ञ प्रसाद तिवारी उनको घरमा आउने गरेको लिला देवी चेहडाले बताएकी छिन् । घर हेर्ने बाहानामा मेरो घरमा पटक/पटक यज्ञ तिवारी आउँथ्यो उनले भनिन् ‘मलाई तँ भनेर बोलाउँथ्यो, गिद्धे नजरले हेर्ने, अनी मलाई छुने, हात हाल्ने कोसिस समेत तिवारीले गर्थ्यो, कहिलेकाहीँ म आउँछु एउटा कोठा खालि गराउनु, म केही गर्दैन नडराउनु भन्ने गर्थ्यो म भागेर जोगिन्थे।’

हामीलाई फसाएर उनले मलाई प्रलोभनमा पार्न खोजेको पनि हुन सक्छ तर हाम्रो मेहनतले बनाएको घर पनि लिन खोजेका छन् । म मरेर गएपनि यो घर छोड्दैन उनले भनिन् ‘रातदिन बालुवा माटोमा सुतेर बनाएको मेरो सपनाको घर हो अब यस्तै भयो र कुनै उपाय लागेन भने घरमै आत्म दाह गर्छु ।’

उक्त घर जग्गा यज्ञ प्रसादले झण्डै ८० लाखमा अर्कैलाई बिक्रि गरेपछि अहिले करनको परिवार बिचल्लीमा परेको छ । ममता प्रसादले घर छोड्न ताकेता गरिरहेका छन् भने करनको परिवार न्यायको लागि भौतारी रहेका छन् ।

आईतबार मात्रै जिल्ला प्रहरी कार्यालय कैलालीमा यज्ञ प्रसादको नाममा ठगी मुद्धा दर्ता गरेका छन् । जिल्ला प्रहरी कार्यालय कैलालीले जाहेरी आएको पक्रिया अगाडी बढाइएको जनाएको छ । तिवारीलाई जिल्ला प्रहरी कार्यालय कैलालीले पटक पटक सम्पर्कमा आउन आग्रह गर्दा पनि आलटाल गरेको जनाएको छ । यसै बिषयमा तिवारीसँग  कुरा गर्न खोज्दा उनि सम्पर्कमा आएका छैनन् ।