धनगढी । सुदूरपश्चिम प्रदेशका मुख्यमन्त्री राजेन्द्र रावलले बहुमत गुमाएका छन् । प्रदेश सभामा नागरिक उन्मुक्ति उपस्थित नभएपछि उनले आज विश्वासको मत पाउन सकेनन् । 

नागरिक उन्मुक्तिको समेत समर्थनमा एक महिनाअघि मुख्यमन्त्री भएका रावलले बहुमत गुमाएपछि आजै मुख्यमन्त्री पद गुमाएका छन् । अब सुदूरपश्चिममा नेपाली काँग्रेस संसदीय दलका नेता कमल शाह मुख्यमन्त्री बन्ने भएका छन् ।

संविधानको धारा १६८ को २ अनुसार २ वा २ भन्दा बढीको समर्थनमा एमाले संसदीय दलका नेता रावल मुख्यमन्त्रीमा नियुक्त भएका थिए । उनी अघिल्लो पुस २७ मा मुख्यमन्त्रीमा नियुक्त भएका थिए। रावलले आज विश्वासको मत लिइसक्नु पर्ने संवैधानिक व्यवस्था रहेको थियो ।

यता १६८ को २ अनुसार मुख्यमन्त्री बनेका रावलले ३० दिन भित्र विश्वासको मत लिन नसके ३ अनुसार ठुलो दलको संसदीय दलको नेता मुख्यमन्त्री बन्ने संवैधानिक व्यवस्था रहेको छ । यही व्यवस्था अनुसार काँग्रेसका शाह भावी मुख्यमन्त्री बन्ने सम्भावना अत्यधिक रहेको छ । उनलाई शुभकामना तथा बधाई दिन सुरु भइरहेको छ ।