धनगढी, २९ भदौ । प्रदेश तथा प्रतिनिधि सभा सदस्य पदको निर्वाचन मंसिर ४ गतेका लागि तोकिएसँगै युवाहरू प्रतिनिधित्व खोज्न थालेका छन् । अहिले युवाहरु आफूहरुको प्रतिनिधित्व हुनुपर्ने भन्दै एजेण्डासहित आफू निकटका नेताहरुसँग लविङ थालेका छन् । यसैबीच कैलालीको निर्वाचन क्षेत्र नम्बर ४ को ‘क’ बाट नेपाली कांग्रेसका युवा नेता फणिराज सापकोटाले प्रदेश सभा सदस्यमा आफ्नो सशक्त दावी रहेको बताएका छन् । धनगढीमा पत्रकारसँगको कुराकानीमा नेता सापकोटाले प्रदेश सभा सदस्यमा आफ्नो सशक्त दावी रहेको बताएका हुन् । 

पत्रकारसँग कुरा गर्दै उनले भने,‘कैलालीको निर्वाचन क्षेत्र नम्बर ४ को ‘क’मा सर्वाङ्गिण विकासका लागि मैले एजेण्डासहित उम्मेदवारीको दावी गरेको छु ।’ कैलाली क्षेत्र नम्बर ४ को ‘क’ को विकासका लागि सबैभन्दा पहिला पहाडी र तराई जोड्ने सडक विस्तार नै आफ्नो मुख्य एजेण्डा रहेको बताउँदै उनले भने,‘कैलालीको चुरे र मोहन्याललाई मसुरिया तथा चौमालासँग जोडेमा मात्रै समग्र क्षेत्रको विकास हुन्छ ।’ पहाडी क्षेत्रका कृषि उपजलाई तराईका बजारसँग जोड्ने र तराईको अन्नबाली पहाडी क्षेत्रमा निर्यात गर्नमा सडक सञ्जाल नै पहिलो प्राथमिकता भएकाले सडक सञ्जाल पहिलो मुद्दा रहेको उनले बताए । मसुरिया, चौमाला र स्याउले बजार जोड्ने पहाडी क्षेत्रका पुराना गोरेटो बाटोलाई स्तरोन्नति गरी मोटर बाटो निर्माण गर्ने योजनासहित आफू निर्वाचनको तयारीमा लागेको उनले बताए । ‘मसँग यहाँको विकासका लागि धेरै योजना छन्,’ उनले भने,‘तिनै योजनाअनुरुप म यसपालि चुनावी दौडमा छु ।’ 

को हुन् सापकोटा ? 
डोटीको घाङलमा जन्मिएका फणिराज सापकोटा नेपाली कांग्रेसको राजनीतिक पृष्ठभूमिमै हुर्किएका हुन् । विद्यार्थी राजनीतिबाट बढी सक्रिय रहेका उनले २०४६ सालको जनआन्दोलनदेखि परिवर्तनका सबै आन्दोलनमा सक्रिय भूमिका निर्वाह गरेका थिए । हाल कैलालीको गौरीगंगा नगरपालिका वडा नम्बर ४ राजीपुरमा बसोबास गर्दै आएका सापकोटा समाजमा सक्रिय सामाजिक कार्यकर्ताका रुपमा परिचित छन् । सहकारी अभियन्ताको रुपमा परिचित सापकोटाले सहकारीमार्फत् जनताको आर्थिक तथा सामाजिक क्षेत्रमा महत्वपूर्ण भूमिका खेलेका छन् । हाल जिल्ला सहकारी संघ लिमिटेड कैलालीका जिल्ला अध्यक्षसमेत रहेको सापकोटा पार्टीको राजनीतिमा पनि उत्तिकै सक्रिय रहेका छन् । 
वडा, गाउँ नगर र क्षेत्र हुँदै विभिन्न पदमा रही कांग्रेसमा क्रियाशील रहेका सापकोटा नेपाली कांग्रेसको कैलाली जिल्ला सल्लाहकार समेत भइसकेका छन् ।