धनगढी । वि.स २०७५ साल जेठमा खुल्ला दिशापीसाब मुक्त घोषणा गरिएको कैलाली जिल्लाको मूख्य बजार र एकमात्र उपमहानगरपालिका धनगढीमा सार्वजनिक शौचालयको अभाब देखिएको छ ।  धनगढी उपमहानगरपालिकाको मुख्य बजार क्षेत्र क्याम्पस रोडदेखि भन्सार कार्यालयसम्म दश भन्दा बढि सार्वजनिक शौचालयको आवश्यकता रहेको बताइएको छ ।उपमहानगरपालिकाका डिभिजनल इन्जिनियर द्विजराज भट्ट का अनुसार अहिले उपमहानगरपालिकाको मुख्य सडकमा व्यवसायीहरूबाट १० भन्दा बढी सार्वजनिक शौचालयको माग आइरहेको छ । तर हाल धनगढी उपमहानगरपालिकाभित्र मुख्य सडकमा सार्वजनिक शौचालय छैनन् । धनगढी उपमहानगरपालिकाको कार्यालयले दिएको जानकारी अनुसार धनगढी बसपार्कमा दुई, उपमहानगरपालिकाको कार्यालय अगाडी एक वटा सार्वजनिक शौचालय सञ्चालनमा रहेका छन् ।उपमहानगरपालिकाको मुख्य सडक तथा बजारमा मात्रै नभएर भित्रि सडक वा सहायक सडकमा समेत सार्वजनिक शौचालय निर्माण आवश्यक रहेको स्थानीय बताउछन् । स्थानीयका अनुसार अहिले मुख्य सडक वा बजारमा मात्रै नभएर शहिदगेटदेखि कैलाली बहुमुखी क्याम्पस सडकमा पनि सार्वजनिक शौचालयको आवश्यकता रहेको छ । धनगढीमा मानिसको चहलपहल हुने तथा सवारी साधनको चाप हुने सडक र बजारमा सार्वजनिक शौचालय निर्माण गर्नुपर्ने अवस्था रहेको छ । इन्जिनियर द्विजराज भट्टका अनुसार माग अनुसारको सार्वजनिक शौचालय निर्माण गर्न बजेट अभाव छैन तर सार्वजनिक शौचालय निर्माणका लागि आवश्यक जग्गा अभाव हुँदा सार्वजनिक शौचालय निर्माणमा समस्या भएको हो । बढ्दो शहरीकरण र जनसंख्याका कारण सार्वजनिक शौचालयको आवश्यकता बढेको छ, तर त्यसको ब्यवस्थापन सहि ढंगले हुन सकेको छैन । धनगढीमा खासगरी सहरी क्षेत्रमा सार्वजनिक शौंचालयको उचित व्यवस्था नहुँदा बटुवा र यात्रुले चर्को समस्या झेल्नु परेको छ ।