बैतडी।बैतडीमा जिप दुर्घटना हुँदा एकजनाको मृत्यु भएको छ । जिल्लाको दोगडाकेदार गाउँपालिका वडा नं ३ घोडेधारमा शनिबार बिहान से १ ज ६०३ नम्बरको जिप दुर्घटना हुँदा दोगडाकेदार गाउँपालिका ८ कालागाउँका ३५ बर्षीय अम्मर बिष्टको घटनास्थलमै मृत्यु भएको प्रहरीले बताएको छ ।कटौजपानीबाट सिल्लेगडातर्फ आउँदै गरेको जिप दुर्घटना हुँदा अन्य ५ जना घाइते भएका छन् । घाइतेमध्ये दुई जनाको अवस्था गम्भीर रहेको छ भने अन्य तीन जनाको अवस्था मध्यम रहेको छ । गम्भीर घाइते हुनेमा दोगडाकेदार गाउँपालिका ८ कटौंजपानीकी  पार्वती बिष्ट र हिरा बिष्ट रहेका छन् । उनीहरुको दुवैको टाउको र छातीमा चोट रहेको छ ।यस्तै दुर्घटनामा परी दोगडाकेदार ८ कटौंजपानीकै ६० बर्षीय पदम बिष्ट, ७ बर्षीया सुशीला बिष्ट र ३० बर्षीया कलावती बिष्ट पनि घाइते भएका छन् ।  घाइते सबैलाई उपचारका लागि जिल्ला अस्पताल बैतडीमा ल्याइएको छ । जिप चालक दोगडाकेदार गाउँपालिका ८ कटौंजपानीका सुरेन्द्र बिष्ट फरार रहेका र उनको खोजी भइरहेको प्रहरी निरीक्षक केसीले बताए । उकालो ब्रेक फेल भएर २० मिटर पछाडि आएर जिप सडकमै पल्टिएको हो । घटनाका बिषयमा थप अनुसन्धान भइरहेको जिल्ला प्रहरी कार्यालयले जनाएको छ ।